I løpet av dei næraste månadene skal Forsvarsbygg halde fire konkurransar om langsiktige avtalar om levering av fjern-/nærvarme. Energien skal produserast av eksterne leverandørar, anten ved eksisterande anlegg (fjernvarme) eller ved lokale anlegg (nærvarme) som ein kan etablere på Forsvaret sin eigedom i tilknyting til kvar einskild leir.
I første omgang er det aktuelt å konkurranseutsetje kjøp av energi til Forsvaret sine bygningar og anlegg på Høybuktmoen ved Kirkenes, Trondenes i Harstad, Bodin i Bodø og Fredriksvern i Stavern. Seinare kan det bli aktuelt å halde nye konkurransar etter same modell for andre sentrale leirar i Forsvaret, både i nord og sør.
Ved å leggje om til meir miljøvenleg energiproduksjon oppfyller Forsvarsbygg sentrale krav om å redusere CO2- utsleppa.
Strategien til Forsvarsbygg er å fase ut det meste av energiproduksjon basert på bruk av oljefyrte og elektriske kjelar, og erstatte kjelane med meir miljøvenleg energiproduksjon basert på til dømes biobrensel eller varmepumper. For å nå desse målsetjingane, inviterer Forsvarsbygg til eit samarbeid med private aktørar, som vil få oppdraget med å levere energi (fjernvarme eller nærvarme) til Forsvaret sine bygningar og anlegg gjennom langsiktige avtalar.
Dersom det trengst vil Forsvarsbygg stille tomter til disposisjon der avtalepartnarar kan etablere nye energisentralar i tilknyting til einskilde leirar. Forsvarsbygg vil òg i framtida sjølv ha ansvaret for distribusjonsnettet inne i leirane.
Forsvarsbygg har tidlegare gjennomført tilsvarande konkurransar for levering av fjernvarme til Rena leir, Terningmoen leir, Kongsvinger festning og Kjeller flystasjon. Røynslene frå desse konkurransane har vore særs positive. I tillegg til miljøgevinsten har Forsvarsbygg opplevd ein vesentleg reduksjon i energikostnadene, noko som igjen reduserer Forsvaret sine driftskostnader.
Fakta:
Forsvarsbygg skal gjennomføre konkurransar for kjøp av miljøvenleg energi på dei følgjande fire stadene i løpet av dei næraste månadene:
Bodin i Bodø, ca. 5 GWh/år
Trondenes i Harstad, ca. 3 GWh/år
Høybuktmoen GSV ved Kirkenes, ca. 7 GWh/år
Fredriksvern ved Stavern, ca. 4 GWh/år
Foto: Tine Poppe